عشان انت مصرى

عشان انت مصرى

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى

بتاع الحضارة وكانى ومانى
ده كله هجايص ما يدخل ودانى
عشان انت مصرى العذاب بيناديك

بتبدأ فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك

مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصلة
ادى المترو واقف وكهربته فاصلة
وفى الميكروباص خناقه حاصلة

اوتوبيس فرامله عايزالها وصلة
وتوك توك ده تايه ومحتاج لبوصلة
بتوصل لشغلك بدم اتحرق

فى زحمه وكتمه وحر وعرق
رئيسك سايبلك كومة ورق
ده غير دمغه ضايعة وملف اتسرق

وفى كام مواطن عاملك قلق
بيشكى تقول له روح اندعق
وعركه وهوجه وشاى اندلق

ومخك خلاص من الصداع اتخلق
هترجع لبيتك ده لو كان فيه بيت
هتوصل هتندم ياريتك ما جيت

مراتك تصرخ خلاص استويت
عيالك بتطلب وهات كيت وكيت
تزعق تهاتى يا ناس اتهريت

ولا حد سامعك مهما هاتيت
عشان انت مصرى وده للاسف
فلازم تآسى تعيش تتقرف

وكل الاساس فى حياتك ترف
فتنسى الكرامه وتنسى الشرف
وتسرق وتنصب او تتحرق

ودمعك بيجرى وجرحك ترف
مش انت اللى مصرى؟؟؟
جتك القرف